Bakardadeak gero eta garrantzi handiagoa hartu du azken urteotan, eta gizarte gisa aurre egin behar diogun erronka nagusietako bat bihurtu da. Horretaz jabetuta, Gipuzkoako Foru Aldunditik eta Adinberritik hiru urte baino gehiago daramatzagu ibilbide partekatua eta partaidetua eraikitzen, hau da, bakardadeei aurre egiteko estrategia bat: HARIAK, Etorkizuna Eraikiz ekimenaren barruan.

Begirada orainean jarrita lan egiten dugu, baina etorkizunari begirik kendu gabe.

2021ean esparru estrategikoa eraiki genuen eskualde bakoitzeko udal eta gizarte eragileekin. 77 udalek, Osakidetzako 6 ESIk, 98 tokiko eragilek eta 20 berrikuntza enpresek eta zentroek hartu zuten parte prozesu honetan. Zuen laguntzari esker, jarduteko esparru estrategiko komun bat eraiki dugu, Hariak Gipuzkoako bakardadeei aurre egiteko estrategia. Estrategia honek bakardadeen fenomenoari belaunaldien arteko eta elkarlaneko ikuspegitik heltzen jarraitzeko balioko digu, gizarte- eta komunitate-loturak sendotuz.

Ondoren, 2022an, lurraldean zehar antolatutako hainbat ekitaldiren bidez egindako lana itzuli genuen, herritarrei zuzendutako elkarrizketa publiko zabala sustatuz eta 1.549 pertsonak parte hartuz, eta Estrategiaren I. Jarduera Planari (2022-2026) hasiera emanez. 2023an, urrats bat gehiago eman genuen Jarduera Planari lotutako proiektuak elkarrekin bultzatzen eta garatzen jarraitzeko, eta parte hartzeko prozesu berri bat garatu genuen. Prozesu horretan, Gipuzkoako 57 udalek/garapen-agentziak, tokiko 77 gizarte-erakundek eta Osakidetzak parte hartu zuten, 4 ESIren bidez; guztira, 274 pertsona.

2024an, KORALE proiektu europarraren lehen urratsak eman genituen, Gipuzkoako Foru Aldundiak gidatuta, Adinberriren bidez, eta Interreg Europe programaren barruan. Helburua da nahi ez diren bakardadeak, bai gazteengan bai adinekoengan, Europa osoko politika publikoen erdigunean egotea. Adinberrirekin batera, beste bost herrialdek parte hartzen dute proiektu honetan: Austria, Danimarka, Irlanda, Belgika eta Portugal. Gainera, Hariak estrategiaren I. Jarduera Planaren esparruan, Adinberrik lurraldeko bakardadeak prebenitzeari eta lantzeari lotutako proiektuak sustatzen jarraitzen du, eta horiei laguntzen die bere Hub-aren bidez.