Ibilaldi osasungarriak du izena ekimenak, eta badu berezitasun bat: ibilbideen egoeraren behaketa aktiboa egiten da, beharrezko konponketak egiteko eta ibilbideen lagunkoitasuna hobetzeko behar diren altzariak edo bestelako elementuak jartzeko. Informazio hori Udalari bidaltzen zaio gero, ibilbidea txukundu dezan.

Hiru ibilbide daude gaur egun, eta horietako bat (0,7 km-koa) herriaren erditik igarotzen da, mugikortasun urriko pertsonek ere parte har dezaten. Ostegunero egiten da ibilaldietako bat, goizeko 10:15ak inguruan abiatuta.

Talde egonkor eta konprometitu bat osatu da, eta hark bultzatzen du proiektua. Hileko azken ostegunean, ibilaldiaren ondoren, kafea hartu eta ibilbideen ebaluazioa egiteko elkartzen da taldea. Nahi duten ibiltari guztiek har dezakete parte bilera horietan. Zehazki, bost laguneko batzorde bat arduratzen da proiektua bultzatzeaz eta hari jarraipena emateaz.
​​​​​​​
Ibilbideak markatuta dituzten herriko mapak inprimatu ditu Udalak, eta interesatuen eskura jarri. Lorpen bat ere aipatu behar da: ibilbideak txukun mantentzeaz eta altzariak konpontzeaz gain, komun publiko bat jarriko da ibilbideetako batean, herriko plazaren albo batean.

Helburu nagusiak: jendea elkarrekin harremanetan jartzea, lagun berriak egitea, betikoa ez den jendearekin hitz egitea.
​​​​​​​
Ibilaldi osasungarrien helburuetako batzuk:

• Mugikortasuna sustatzea.
• Harreman sozialak bultzatzea.
• Ohitura osasungarriak sustatzea.
• Erakargarri egitea jarduera hori, etxean geratzeko ohitura duen jende sedentarioarentzat.
• Ibilbideen lagunkoitasuna hobetzea.

• Nagusiak
• Publiko orokorra