HARIAK-ek Gipuzkoako Bakardadeei aurre egiteko saretzea mamitzeko prozesua egin du lurraldeko eskualdeetan egindako saioen bidez
Hariak estrategia lantzen hasi zen unetik beretik Adinberrik argi izan du tokian tokiko eragileekin batera elkarlana egin beharko duela esperientziak arrakasta izan dezan: estrategiaren dokumentua bera aditu eta aritu sare zabalarekin landu zen eta lurraldeko udal eta eragileekin aberastu eta osatu egin zen 2019 eta 2021 urteen artean. Orain, Hariak Hub-a abiatzearekin batera, modu berean jarduteko asmoarekin jarraitzen dugu.
Hori dela eta, 2023 urtearen hondarrean eskualde mailako prozesua abiatu zen Hariak sarearen berri emateko eta lurraldeko eragileen asmoak eta beharrak detektatzeko asmoz. Prozesuak bi helburu nagusi izan ditu: alde batetik; informatiboa, Hariak estrategiaren baitan egin diren azken aurrerapausoen berri interesdunei zuzenean eta aurrez aurre emateko, eta baita aurki zabalduko den dirulaguntza lerro berriaren gaineko xehetasunak aurkezteko ere, eta, bestetik, interaktiboa eta parte hartzailea, lurraldeko eragileen nahiak eta beharrak detektatzeko Hariak sarearen diseinua horien baitara egokitzeko xedearekin.
Orotara, hamar saio izan dira, eskualdeko bakoitzeko bat eta Donostian azkena. Saioak 2023ko azaroaren 14aren eta abenduaren 13aren artean izan dira, eta guztira 274 pertsona bertaratu dira (179 emakume eta 95 gizon). Gipuzkoako 57 udal edo garapen agentzia eta 81 eragile egon dira presente (askotarikoak: Osakidetza, hirugarren sektoreko elkarteak eta adinekoen elkarteak eta antzekoak).
Hariak sareari buruzko eskaerak eta ekarpenak
Gipuzkoako eskualdeetan egindako saioen lehen zatia Hariaken ibilbideari buruzko informazioa emateko baliatu da, eta, horrekin batera, idazkaritza tekniko sortu berriaren egitekoak azaltzeko ere. Funtsean, hauek dira Hub-aren egiteko nagusiak:
Estrategiaren jarraipena, dinamizazioa, komunikazioa eta ebaluazioa
Hariak dirulaguntza deialditik eratorritako proiektuak
Estrategiarekin bat egin duten eragileei zuzenduta |
Informazioa zabaltzeaz haratago, topaketa hauek baliatu dira parte hartzaileei galdetzeko zein den saretik espero duten laguntza eta zer egiteko prest dauden, bakoitzaren ahalmenen arabera, izan ere, agi dago bakardadeari gertutasunetik eta tokian tokiko errealitateetatik erantzun behar zaiola. Hori dela eta, saio hauen bidez sarearen estrategia zehazteko entzute ariketa zabala egin da. Hauek izan dira jasotako eskaera nagusiak:
|
Zer eskatzen diozu Hariak sareari?
Nagusiki hauek izan dira eskaera nagusiak: bultzada, lidergoa eta baliabide ekonomikoak eta teknikoak jasotzeko bideak eta elkarlanerako bideak zabaltzea. Era berean, gaiari buruzko ezagutza jasotzeko bidea izan beharko luke sare hau eta metodologia eskaintzeaz gain, eragileak artikulatuko dituen gunea izatea.
|
|
Eta zure erakundea zer eskaintzeko prest dago Hariak sareari?
Kasu honetan, tokian tokiko erakundeek eta elkarteek iniziatiba zehatzak eta bere jarduna dauzkate partekatzeko (proiektu zehatzak, agenda, boluntario sarea, espazioak eta azpiegiturak). Era berean, lurraldean eskarmentu handiko eta ibilbide luzeko profesionalak daude eta tokian tokiko sareak eta komunitateen ezagutza handia dutenak. Horiek Hariak sarearekin ondo koordinatzeko eta egokitzeko ezinbesteko agenteak izango dira. |
Saioetan jasotako balorazioak oso positiboak izan dira eta Hariak sareari aurrera begira lan egiten jarraitzeko indarra ematen diote, izan ere, bertaratutako erakundeen %76 etorkizunean Hariak sarearekin kolaboratzen jarraitu nahi duela adierazi du gutxienez, gainerako %24 bere erakundean kontsultatzeko beharra duela adierazi duelako.
Eta aurrera begira zer? Egia da aurtengo urtean zehar hainbat aldaketa eman direla antolaketa aldetik eta, hori dela eta, Hariak lehen dirulaguntza deialdia argitaratu bitartean Hub-ak bere egitekoak birplanifikatu behar izan dituela. Hori dela eta, lurraldeko esperientzien datu basea elikatzen jardun dugu azken hilabeteotan 2021eko prozesuan jasotako egitasmoen informazioa eguneratuz eta laster egongo dira ikusgai Hariak webgune berrituan.
Era berean, gogoratu hemen daukazuela Hariak sarearekin bat egiteko esteka. Denon ekarpenarekin indartsuagoak izango garelako bakardadeei aurre egiteko.